[size=18]
السلام عليكم و رحمة الله و بركاته ،،،
جئتكم بقصه او حلقات قصصيه من ابداعات اخ كريم لي يحبذ ان يكنى بأمير الليل
بصراحه لم اعرف اين اضع هذا الموضوع في هذا المنتدى
ولكن بما ان القصه اماراتيه بحته (باللهجه العاميه) ففضلت ان اعرضها هنا في هذا القسم
واتمنى ان تسمح لي ادارة المنتدى بعرض القصه هنا
القصه حتى الان لها تقريبا 68 حلقه او جزء (مسلسل مكسيكي اماراتي ) واتمنى ان تعجبكم وان تتواصلوا معها
يقول أمير الليل في مقدمة يوميات حمود وعبود
طبعا اخواني أنا ما أعرف في مجال القصص .. لكن الفكرة عبارة عن قصص من الفريج .. كل يوم قصة .. القصص من السبعينات و مطلع الثمانينات .. هي عبارة عن سوالف بين بطلين .. عبود و حمود وربعهم سلطون ويمووع .. أبطالنا .. يسولفون ويا بعضهم .. سوالف يهال أو تقدرون تقولون سوالف ناس على نياتهم .. في زمن ما فيه كمبيوترات و لا انترنت و لا وسائل لعب و تسلية .. ما بطول عليكم .. بخليكم مع القصص و اتمنى انها تعجبكم .. و إن شاء الله كل يوم قصة.
أميــــ الليــــل ـــــر
المقدمه
حمود و عبود ربع اتربوا ويا بعض من يوم هم صغار .. ساكنين في فريج واحد .. فريج هور العنز في دبي .. ما يفارقون بعض أبد .. في نفس الصف .. يالسين إحذال بعض في آخر الصف .. لو حد منهم اتعرض لأي مشكلة تلاقي الثاني يفزع لو كان ربيعه هو الغلطان .. حمود و عبود فوضوية و امخبلين بمدرس اللغة العربية المصري .. و في حصة الرياضيات كله سوالف و ما ينتبهون لأنهم مب فاهمين شي .. في المرحلة الابتدائية درسوا في مدرسة صلاح الدين الأيوبي شرق هور العنز و بالتحديد في منطقة الصفية .. و الحينه هم في المرحلة الاعدادية و يدرسون في مدرسة المهلب في الحمرية.
عبود و حمود ما يوصل الباص لفريجهم لأن فريجهم كله رمل لذلك يسيرون المدرسة مشي .. كم تعرضوا لعضات الجلاب و للبرد القارص و المطر في الشتاء و للحر و اللاهوب في الصيف .. لكنهم مع ذلك ما قد غابوا عن المدرسة .. صح انهم ما ينبتهون في الحصص لكنهم أذكياء و درجاتهم عالية و متفوقين رغم انهم فوضوية .. حتى المدرسين مستغربين منهم .. كيف فوضوية و يتحدون الشطار في الامتحانات .. في الرياضيات ما ينتبهون في الصف و ييلسون ياكلون (حَب) اللي يشترونه من عند الهندي اللي يالس عند باب المدرسة .. و مع ذلك يوم يسأل الأستاذ سؤال صعب و محد يقدر يجاوب عليه ينش حمود و إلا عبود و يجاوبون عليه بكل سهولة.
حمود و عبود يكرهون شي أسمه لغة انجليزية .. ما يطيقون هاللغة مرة .. و دوم في حصة اللغة الانجليزية يتعذرون للأستاذ إنهم بيسيرون الحمام .. و من يظهرون ما يردون إلا آخر الحصة عشان ما يسجلهم الأستاذ غياب.
حمود و عبود يحبون الأفلام الهندية .. حمود مسمي عمره على إسم الممثل الهندي (راجيش كنا) و عبود مسمي عمره (أميتا باتشا) .. من يحصلون فلوس في الأعياد و إلا من سرقة الحمام اللي متخصصين فيها على طول بدون تأخير يسيرون سينما دبي و يدخلون فيلم هندي .. و يا حظهم لو كانوا فيلمين بتذكرة وحدة .. يسوون حفلة .. بعد ما يخلص الفيلم يسيرون المطعم الهندي اللي في السينما و يتعشون كيما و براتا و ساعات ناشف .. حمود يحب الناشف وايد و عبود يموت على الكيما .. يحلمون إينهم يسافرون الهند في مركب سامعين عنه أسمه (دواركا) و هذا المركب كان لنقل الركاب و طبع في الخليج لكنهم مب مقتنعين لأنهم يتخيلون عمارهم دوم على المركب هذا و هم سايرين الهند .. يبون يسيرون كولابا و أوتي و جاباتي .. يبون يحوطون في الهند كلها و يشوفون راجيش كنا و أميتا باتشا ..عبود و حمود يحبون الممثلة الهندية هيما مالي .. يتضابون عليها دوم .. حمود يقول تحبني و عبود يقول إنت خسف و أنا أحلى عنك هي تحبني أنا لأني وسيم و جميل .. بس المشكلة إن كل واحد منهم أخس عن الثاني .. كلهم جلح ملح ما يتشاهدون .. بس على نياتهم.
هاي مقدمة بسيطة عن أبطالنا اللي بيرافقونا في رحلة طويلة ما ندري متى بتنتهي .. أبطال حلقاتنا القادمة .. حمود و عبود
يالله تعالوا نسمع سوالف حمود و عبود و أتمنى إنها تعجبكم
مع تحياتي
أميــــ الليــــل ـــــر
- 1 -
دق جرس الحصة الأخيرة و انتهى اليوم الدراسي .. حمود و عبود بعدهم يتهازبون ويا محمود عبدالتواب الطالب المصري و زميلهم في الصف
حمود : حوووووووه إنته ويا هالراس اللي تقول بوبره .. شو تحرا عمرك ها ؟
محمود المصري : يا محمد أنا بأحترمك و ما اتخلينيش أغلط عليك
عبود : أوب أوب أوب لحظة .. منو بيغلط على منو ؟ .. إنت ويا هالشكل بتغلط على عبود تروم إنته ؟
جان فيك خير سوها .. و إلا أقولك تعال برع المدرسة خل أغسل لك شراعك .. حيوان واحد
محمود المصري : لا لا لا كده أزعل .. ما تغلطش و تقول حيوان .. خليك محترم
حمود : أيييييييييييييه عبود محترم غصباً عنك و عن شكلك .. تفهم ؟ .. و الله لأدوسك في بطنك ترا
يركض عبود صوب محمود و يضربه بوكس في ويهه و يتم الولد يصارخ و يباغم آآآآآآآآآآآآآآآي عيني .. عبود و حمود شلوا بعمارهم و ركضوا برع الصف و هم شالين شنطهم لكن الأستاذ فاروق وكيل المدرسة كان يراقب الأوضاع و مسكهم
الأستاذ فاروق : تعوا لهون إنت وياه
حمود و عبود يمشون صوب الأستاذ فاروق و هم منزلين روسهم تحت
الأستاذ فاروق يمسك كل واحد من إذنه و يتكلم وياهم
الأستاذ فاروق : ليش عاملين فوضه و ضاربين الولد زميلكم
حمود : قسم بالله أستاد ما ضربناه هو اللي طاح من على الطاولة
عبود : هيه أستاد لأنه كان راكب على الطاولة مال المدرسين و يناقز
محمود الطالب المصري يمشي و هو يصيح و يتقرب من الأستاذ فاروق
محمود المصري : و الله العظيم يا أستاز عبدالله (عبود) هو اللي ضربني في وشي و تحت عيني
عبود : أيه لا تتبلا علي أنا كنت واقف احذالك يوم طحت من على الطاولة و وقفتك على ريولك يعني يزايه الحينه .. أوكي طيح مرة ثانية وشوف منو اللي بيوقفك برايك يعلك الموت
الأستاذ فاروق : بلا قلة أدب ولاه .. لا اتخليني أطردك من المدرسة
عبود : حرام عليك أستاذ و الله ما سويت فيه شي .. حتى عندي شهود
و يقوم عبود يزقر يموع و شلته
عبود : يموووووووووع تعال إنت و الربع و خبروا الأستاد منو اللي ضرب هالمصري
يموع و هو ساير صوب الأستاذ فاروق يمشي رافع صدره فوق و وراه ربعه الفوضويه
يموع : أستاد فاروق .. هالمصري لوتي وجذاب .. محد ضربه و لاشياته .. كنا واقفين عند باب الصف نبا نظهر و إلا نشوفه يبغم آآآآآآآآآي
عبود : يموع في ذمتك و راس أمك مب كان راكب على الطاولة و بعدين طاح
يموع اتوهق لأن عبود حلفه براس أمه : ها ! .. هيه ! .. صح .. طاح من على الطاولة
يموع يهمس في إذن عبود : ما يخصك براس أمي يا السبال .. عنلاتك إنت و هالمصري الجلب
الأستاذ فاروق : مين كان حاضر معكن غير جمعة (يموع) ؟
حمود : اسأل كل اللي في الصف .. هاذم جدامك
الأستاذ فاروق يطالع الطلبة في ويوهم و يسأل طالب أردني شاطر و مؤدب : يا وائل .. شو رايك في الكلام اللي سمعته ؟
عبود و حمود و يموع يطالعون وائل بطرف عيونهم و هم يتوعدونه بحركاتهم اللي من تحت لين تحت لو قال الحقيقة
وائل مرتبك و خايف من ردة فعلهم لو قال الصدق فتم ساكت و منزل راسه الأرض و مب عارف بشو يرد على الأستاذ فاروق
يموع يتقرب من وائل و هو يضحك مسوي عمره وايد طيب .. يهمس في إذن وائل : لو فيك خير قول غير اللي قلناه و الله لأملحك اليوم تفهم يا الخايس ؟
وائل يرتبك و يقول و هو خايف : الأستاذ أنا ما شفت إشي بنوب
عبود يقول : يا أستاد اسأل بقية الطلاب .. هاذم جدامك .. هذا يتبلى علينا دوم
يتكلم عبود و يسوي عمره يصيح .. و الله أستاد دوم يضربني في الصف و أنا ما أشتكي و أقوله الله يسامحك .. هذا من زمان يضربني أستاد .. يضربني أنا و محمد (حمود) .. و يسوي عمره ينشف دموعه من عينه
الأستاذ فاروق : خلاص يا عبدالله إنت و محمد .. تقدروا تنصرفوا و ما بدي مشاكل مرة تاني مفهوم ؟
حمود و عبود في صوت واحد : حاضر أستاد بس إنت قول حق هذا لا يتعرض لنا مرة ثانية
و يتحرك عبود و حمود صوب يموع و شلته و يسيرون بعيد و الولد المصري ميود ويهه و يصيح و يموع يضحك عليه من بعيد و يقول له : هههههههههههههههه دواك .. حد قالك تستريل على الربع ويا راسك
و يتجمعون الشله حمود و عبود و قوم يموع و ربعهم و يسيرون جدا راعي السمبوسة الهندي اللي من يشوفهم يرتبك و يضم كرتون السمبوسة لصدره قوووووووو و يقول لهم : خلاس اليوم ما فيه سمبوسه
يتقدم يموع من الهندي و يقوله : حووووووووه إنته و الله لأخلي أبويه يسفرك بمبي في لنج ترا .. هات الكرتون أحسن لك لأكسر ضلوعك و فجك اليوم
يسحب يموع الكرتون عن الهندي و يوزع سمبوسه على ربعه و ينصرف و الهندي ميت غصة و يسب بالهندي و المليباري
إلى اللقاء مع حلقة جديدة من سوالف حمود و عبود
ينقلها لكم
عيون المها
الخميس أغسطس 07, 2008 2:15 pm
